Աշխարհում գրեթե ամեն ինչ թվային է դարձել Ինտերնետի միջոցով։ Մենք արդեն 1 րոպե անգամ չենք պատկերացնում մեր կյանքը առանց նրա՝ Ինտերնետի։ Լինի տանը, աշխատավայրում, փողոցում, թե սրճարանում, նա մեզ օդ ու ջրի պես անհրաժեշտ է։ Անվերջ տեղեկատվություն, շփում, աշխատանք, խորհրդատվություն, առևտուր, անգամ ճանապարհորդություն, այս ամենը կարող է մեզ հասանելի դառնալ 1 քլիքով՝ շնորհիվ ամենազոր համացանցի։
Մեր բլոգում հավաքել ենք մի քանի ուշագրավ փաստեր նրա մասին։
1. Շուրջ 4.9 մլրդ ակտիվ օգտատեր
Այո, նա իսկապես գրեթե ամենուր է։ 2021 թ․-ի տվյալներով աշխարհում Ինտերնետից օգտվողների թիվը հասնում է շուրջ 5 միլիարդի։ Փաստորեն դեռ կան մարդիկ, ովքեր դեռևս չեն օգտվել Ինտերնետից։ Հետաքրքիր է, ինչպիսի՞ն է նրանց կյանքը։
2. Բջջայինն առաջատարն է
Ինտերնետից օգտվել հնարավոր է տարատեսակ սարքերից, որոնց շարքերում առաջատար դիրք են զբաղեցնում բջջային սարքերը․ շուրջ 4.28 մլրդ օգտատեր միանում է համացանցին հենց բջջայինով։
3. Համացանցում գործում է ավելի քան 1.86 մլրդ կայք
Եթե ցանկանում ես դառնալ world wide web-ի մի մասնիկը, ուրեմն քեզ անհրաժեշտ է կայք։ Այսպիսով, համացանցում այս պահին իրենց գործունեությունն են ծավալում ավելի քան 1.86 միլիարդ կայքէջեր՝ ներկայացնելով տարաբնույթ ծառայություններ, ապրանքներ, տեղեկատվություն և այլն։
4. Ինտերնետի լեզուն անգլերենն է
Գաղտնիք չէ, որ Ինտերնետում ամենատարածված լեզուն անգլերենն է։
Համացանցի ավելի քան 25.3 % -ը անգլերենն է զբաղեցնում, 19.8%-ը չինարենն է, իսկ 8%-ը՝ իսպաներենը։
5. Հյուսիսային Կորեան մերժել է Ինտերնետը
Ինտերնետն ընդհանրապես հասանելի չէ Հյուսիսային Կորեայում: Միայն որոշ բարձրաստիճան պաշտոնյաների է թույլատրվում մուտք գործել համաշխարհային Ինտերնետ ցանց: Այլ քաղաքացիներ կարող են մուտք գործել միայն երկրի ներքին intranet, որը կոչվում է Kwangmyong։
6. Դանիան, Իսլանդիան, ԱՄԷ, Քուվեյթը և Քաթարը առաջատարներն են
Ի տարբերություն Հյուսիսային Կորեայի՝ Դանիայում, Իսլանդիայում, ԱՄԷ-ում, Քուվեյթում և Քաթարում բնակչության 98-99%-ը օգտվում է Ինտերնետից: Այս երկրներն ունեն Ինտերնետի ներթափանցման ամենաբարձր ցուցանիշն աշխարհում։
7. Chrome բրաուզերը ֆավորիտն է
Chrome վեբ բրաուզերն ամբողջ աշխարհում օգտագործում է ինտերնետից օգտվողների 65,9%-ը։ Նրան հաջորդում է Safari-ն՝ 16.82%, իսկ 3-րդ տեղում է Firefox-ը՝ ընդամենը 4.09%։ Իսկ դու ո՞ր բրաուզերն ես նախընտրում։
8. Ամենաարագը Սինգապուրում է
Սինգապուրը այստեղ նույնպես աչքի է ընկնում իր առաջադիմությամբ։ Այստեղ մարդիկ օգտվում են ամենաարագ ֆիքսված լայնաշերտ կապից ՝ 213,18 Մբ/վ ներբեռնում։
9. Առաջին կայքը Symbolics.com-ն էր
1985-ի մարտի 15-ին գրանցվեց աշխարհում առաջին դոմենը՝ symbolics.com, որը մինչ այժմ գործում է։
10. Google-ը ակնհայտորեն առաջատար որոնողական համակարգն է
Ինտերնետ օգտատերերի 92․17%-ն օգտվում է Google որոնողական համակարգից, որը կազմում է ավելի քան 4․2 միլիարդ մարդ: